ભરૂચ જિલ્લાના ઝઘડીયા તાલુકાના એક ગામે રહેતી એક સગીર વયની યુવતીનું રાત્રિ દરમિયાન કોઇ અપહરણ કરી ગયુ હોવાની ફરિયાદ રાજપારડી પોલીસમાં લખાવા પામી છે. આ સગીરા તેના પરિવારજનો સાથે રાત્રે સૂતી હતી. બાદમાં તે ઘરમાં ન જણાતા કોઇ તેનું અપહરણ કરી ગયુ હોવાનું જણાતા તેના પિતાએ રાજપારડી પોલીસ મથકમાં ફરિયાદ નોંધાવી હતી. વિગતો મુજબ ઝઘડિયાની એક કન્સ્ટ્રકશન કંપનીમાં કામ કરતા ૪૦ વર્ષીય ઇસમને સંતાનમાં ચાર પુત્રીઓ છે. ગત તા.૧૯.૧૦.૨૦ ના રોજ તે પરિવાર સાંજે જમી પરવારી સુઈ ગયો હતો. વહેલી સવારે તે ઇસમ તેને નાઈટની નોકરી કરી ઘરે આવ્યો હતો ત્યારે તેની ચાર પુત્રીઓ પૈકીની બીજા નંબરની પુત્રી જે તેની માતા સાથે સૂતી હતી તે ત્યાં હતી નહીં. પુત્રીની આજુબાજુમાં તથા ગામમાં તપાસ કરતા તે મળી આવી ન હતી જેથી પરિવારને એમ લાગ્યું કે કોઈ અજાણ્યા ઇસમ તેની પુત્રીનું અપહરણ કરી લઈ ગયા છે. જેથી તેમણે ગત રોજ રાજપારડી પોલીસ મથકમાં તેની પુત્રીનું અપહરણ થયાની ફરિયાદ નોંધાવી હતી.પોલીસે ગુનો નોંધી તપાસ હાથ ધરી હતી.
ગુલામહુશેન ખત્રી રાજપારડી જિ.ભરૂચ
