ભરૂચ જિલ્લાના ઝઘડિયા તાલુકાના મુલદ ચોકડી નજીક નેશનલ હાઇવે પર એક હાઇવા ટ્રકના ચાલકે એક મોટરસાયકલને અડફેટમાં લેતા મોટરસાયકલ ચાલક બે યુવકો ઇજાગ્રસ્ત થયા હતા.
પ્રાપ્ત વિગતો મુજબ અંકલેશ્વર તાલુકાના માંડવા ગામે રહેતો અલ્પેશ અમરસિંગ વસાવા નામનો યુવાન તા.૫ મીના રોજ બપોરના બે વાગ્યાના અરસામાં તેના મિત્ર કરણ સાથે મોટરસાયકલ લઇને મુલદ ચોકડી નજીક આવેલ પેટ્રોલ પંપ પર પેટ્રોલ પુરાવવા ગયા હતા. આ લોકો પેટ્રોલ પુરાવીને પાછા ફરતા હતા ત્યારે બપોરના અઢી વાગ્યાના સમયે મુલદ ચોકડી નજીક હાઇવે પર સામેથી આવતી એક હાઇવા ટ્રકે અલ્પેશની મોટરસાયકલને અડફેટમાં લેતા અકસ્માત સર્જાયો હતો. આ અકસ્માતમાં મોટરસાયકલ સવાર બન્ને યુવકો મોટરસાયકલ સહિત નીચે પડી ગયા હતા. આ અકસ્માતમાં અલ્પેશને માથાના ભાગે તેમજ હાથપગ પર ઇજાઓ થઇ હતી. તેમજ તેના મિત્ર કરણને પણ થોડી ઇજા થઇ હતી. અકસ્માત સ્થળે ભેગા થઇ ગયેલ માણસો પૈકી કોઇએ એમ્બ્યુલન્સને કોલ કરતા એમ્બ્યુલન્સ આવતા ઇજાગ્રસ્ત અલ્પેશને ભરૂચ સિવિલ હોસ્પિટલ ખાતે સારવાર માટે લઇ જવાયો હતો.આ અકસ્માતમાં અલ્પેશની મોટરસાયકલને પણ નુકશાન થયું હતું. અકસ્માતની આ ઘટના બાબતે અલ્પેશભાઇ અમરસિંગભાઇ વસાવા રહે.ગામ માંડવા તા.અંકલેશ્વરનાએ અકસ્માત કરનાર હાઇવા ટ્રકના ચાલક વિરુધ્ધ ઝઘડિયા પોલીસમાં ફરિયાદ લખાવી હતી.
