ભરૂચ જીલ્લામાં ઘણા ઔદ્યોગિક એકમોમાં અવારનવાર સર્જાતી દુર્ઘટનાઓમાં કામદાર શ્રમિકોના મોત પણ થતાં હોય છે. આવી જ એક જીવલેણ ઘટનામાં ઝઘડિયા નજીક આવેલ બોરોસીલ નામની કંપનીમાં બોરનું કામ કરતી વખતે હાઇડ્રાનો બેલ્ટ તુટી જતા લોખંડની પ્લેટ પર કામ કરતા લેબર પર પડતા પ્લેટ નીચે દબાઇ ગયેલ આ લેબર ગંભીર રીતે ઇજાગ્રસ્ત થતાં તેનું મોત નીપજ્યું હતું.
મળતી વિગતો મુજબ મુળ વેસ્ટ બંગાલનો રહીશ અને હાલ બોરોસિલ કંપનીની લેબર કોલોની ખાતે રહેતો ૩૦ વર્ષીય સફીકુલ તામીજઉદ્દિન શેખ ગતરોજ તા.૧૯ મીના રોજ અન્ય કામદારો સાથે બોરોસિલ કંપનીમાં પાયલિંગ (બોર) નું કામ કરવા ગયો હતો, તે દરમિયાન સવારના અગિયાર વાગ્યાના સમયે હાઇડ્રાનો બેલ્ટ તુટી જવાથી લોંખડની પ્લેટ નીચે પડી હતી. આ પ્લેટ નીચે સફીકુલ દબાઇ જતા તે ગંભીર રીતે ઇજાગ્રસ્ત થયો હતો. ત્યારબાદ સફીકુલને એમ્બ્યુલન્સ દ્વારા ભરૂચ સિવિલ હોસ્પિટલ ખાતે લઇ જવાયો હતો, જ્યાં આ ઇજાગ્રસ્ત કામદારને ફરજ પરના તબીબે મૃત જાહેર કર્યો હતો. ઘટના બાબતે મૃતકના પિતરાઇ ભાઇ નાઝીરહુશેન શેખ હાલ રહે. બોરોસિલ કોલોની અને મુળ વેસ્ટ બંગાલનાએ ઝઘડિયા પોલીસ મથકે ફરિયાદ લખાવતા પોલીસે ગુનો નોંધી તપાસ હાથ ધરી હતી. ઉલ્લેખનીય છે કે ઝઘડિયા તાલુકામાં આવેલા ઉધોગો પૈકી ઘણા ઉધોગોમાં વારંવાર સર્જાતી જીવલેણ ઘટનાઓને લઇને ઉધોગોમાં કામ કરતા કામદારોની સલામતી બાબતે સવાલો ઉઠવા પામ્યા છે.
ગુલામહુશેન ખત્રી રાજપારડી જી.ભરૂચ
