લીંબડી હાઇવે પરની ઝુંપડપટ્ટીમાંથી એક મહિલાની લાશ મળી આવી હતી. જેમાં મહિલાના પ્રેમીએ જ રૂપિયાની માથાકુટમાં પથ્થરના ઘા ઝીંકી મહિલાની હત્યા કર્યા હોવાનું ખુલતા પોલીસે મહિલાના પ્રેમીની ધરપકડ કરી કાયદેસર કાર્યવાહી હાથ ધરી છે.
લીંબડી હાઇવે પર આવેલા ઝુંપડપટ્ટીમાંથી આ જ વિસ્તારમાં રહેતા મધુબેન સોલંકીની લાશ મળી આવી હતી. જેમાં મ્રુતક મહિલાના પરિવારજનો દ્વારા મહિલાને તેના પ્રેમીએ દારૂ પીવડાવી મોતને ઘાટ ઉતારી હોવાનો આક્ષેપ કરતા પોલીસે લાશને પીએમ માટે મોકલી આપી હતી. પોસ્ટમોર્ટમ રિપોર્ટમાં મહિલાને માથાના ભાગે બોથડ પદાર્થ વાગવાથી મોત થયાની વિગતો બહાર આવી હતી. મૃતક મહિલા મધુબેન છેલ્લા થોડા વર્ષોથી તેના પ્રેમી રામજી ધના સોલંકી સાથે રહેતી હતી. આથી પોલીસે રામજી સોલંકીની આકરી પુછપરછ હાથ ધરી હતી. રામજીની પહેલી પત્નિ થાડા વર્ષ અગાઉ ગુજરી ગઇ હતી જેના વિમા ક્લેઇમના રૂપિયા આવ્યા હતા જે રૂપિયા બાબતે મધુબેન અને રામજી વચ્ચે બોલાચાલી થતી હતી અને હત્યાના બનાવના દિવસે પણ આ જ બાબતે થયેલી બોલાચાલીએ સ્વરૂપ ધારણ કરતા ઉશ્કેરાયેલા પ્રેમી રામજીએ પથ્થરના ઘા માર્યા હોવાની પોલીસ સમક્ષ કબુલાત કરી હતી. આથી પોલીસે રામજી સોલંકીની ધરપકડ કરી વધુ પુછપરછ હાથ ધરી છે.
કલ્પેશ વાઢેર સુરેન્દ્રનગર
