ભરૂચ જિલ્લાના ઝઘડીયા તાલુકાના રાજપારડી નજીક એક ઓટો રીક્ષામાં લઇ જવાતો શંકાસ્પદ અને ચોરીનો મનાતો ૨૦૦ લીટર ડીઝલનો જથ્થો પકડાયો હતો. પોલીસે ત્રણ ઇસમોની અટકાયત કરીને મુદ્દામાલ કબજે લીધો હતો.
વિગતો મુજબ રાજપારડી પીએસઆઇ જાદવ અને પોલીસ જવાનો રાજપારડીના નેત્રંગ રોડ પર પેટ્રોલિંગમાં હતા ત્યારે વાહન ચેકિંગ દરમિયાન નેત્રંગ તરફથી આવતી એક ઓટો રીક્ષામાં ચાર પ્લાસ્ટિકના કાર્બાઓ જણાતા પોલીસે તપાસ કરતા તેમાં ૨૦૦ લીટર જેટલું ડીઝલ ભરેલુ જણાયુ હતુ. પોલીસે સાથે રહેલા ઇસમોની પુછપરછ કરતા કોઇ બીલ કે આધાર પુરાવા મળ્યા ન હતા. તેથી પોલીસે આ શંકાસ્પદ અને ચોરીના મનાતા ૨૦૦ લીટર ડીઝલના જથ્થા સાથે કાદરખા અહમદખા પઠાણ રહે. નવી તરસાલી તા. ઝઘડીયા, ઇસ્માઇલ બસીર મલેક રહે.નવી તરસાલી તા.ઝઘડીયા અને ભાનુભાઇ લાલજીભાઇ વસાવા રહે. નવા માલજીપુરા તા.ઝઘડીયાને હસ્તગત કરીને ડીઝલ, ઓટો રીક્ષા તેમજ બે નંગ મોબાઇલ મળી કુલ રૂ.૬૨૦૦૦ નો મુદ્દામાલ કબજે લઇને કાયદેસર કાર્યવાહી હાથ ધરી હતી.
ગુલામહુશેન ખત્રી રાજપારડી જિ.ભરૂચ
