પંચમહાલ જિલ્લાની મોરવા હડફ વિધાનસભા બેઠકની પેટા ચૂંટણીનું મતદાન આજે શાંતિપૂર્ણ માહોલમાં શરૂ થયું હતું. સવારમાં નવ વાગ્યા સુધીમાં ૧૧૦૩૪ પુરુષ અને ૬૯૦૩ મહિલાઓ સહિત ૧૭૯૩૭ મતદારોએ પોતાના મતાધિકારનો ઉપયોગ કર્યો હતો. જેની ટકાવારી ૮.૧૮ જેટલી થવા જાય છે. ઉનાળાની ગરમીને ધ્યાને રાખીને મતદારોમાં વહેલી સવારમાં જ મતદાન કરી નાંખવાનો ટ્રેન્ડ જોવા મળ્યો હતો.
મોરવા હડફ બેઠકના વિવિધ મતદાન મથકો ઉપર સવારમાં જ મતદારોએ લાઇનો લગાવી હતી. મતદારોને સર્વ પ્રથમ થર્મલ ગનથી ચકાસવામાં આવતા હતા. જો તેમના શરીરનું તાપમાન સામાન્ય હોય તો જ તેમને મતદાન કેન્દ્ર પરિસરમાં પ્રવેશ આપવામાં આવતો હતો. આ ઉપરાંત, તેમને સેનેટાઇઝરથી હાથ સાફ કર્યા બાદ પ્લાસ્ટિક મોજા પણ ઉ૫લબ્ધ કરાવવામાં આવ્યા હતા.
કોરોના સામે સુરક્ષિત કરવા માટે ચૂંટણી તંત્ર દ્વારા કરાવેલી વ્યવસ્થાથી મતદારો પ્રભાવિત થયા હતા. જિલ્લા ચૂંટણી તંત્ર દ્વારા કોવિડ-૧૯ ની માર્ગદર્શિકાના સંપૂર્ણ પાલન સાથે આ પેટા ચૂંટણી કરવામાં આવી છે. ઘણા મતદાન મથકો ઉપર મહિલાઓ અને યુવા મતદારોની લાંબી કતારો જોવા મળી હતી. ખાસ કરીને લોકશાહીના આ પર્વમાં ભાગ લેવા માટે યુવા મતદારો ભારે ઉત્સુક હતા. કેટલાક યુવા મતદારોએ જિલ્લા ચૂંટણી દ્વારા આપવામાં આવેલી સમજ તો કેટલાક મતદારોએ ઇન્ટરનેટના માધ્યમથી કેવી રીતે ઇવીએમ દ્વારા મતદાન કરવું તેની સમજણ મેળવી હતી. જિલ્લા ચૂંટણી દ્વારા કોઇ મતદાર બાકી ન રહી જાય એવી વ્યવસ્થાના ભાગ રૂપે દિવ્યાંગો માટે ખાસ વ્હિલચેર તથા વાહન સાથે સ્વયંસેવકોનો પ્રબંધ કરવામાં આવ્યો હતો. કેટલાક મતદાન મથકો ઉપર આવા સ્વયં સેવકો દિવ્યાંગ મતદારોએ સહાયરૂપ બનતા જોવા મળ્યા હતા. જિલ્લા કક્ષાએથી કલેક્ટર અમિત અરોરા, એસપી લીના પાટીલ, નાયબ જિલ્લા ચૂંટણી અધિકારી નેહા ગુપ્તા સમગ્ર પ્રક્રીયા ઉપર સતત નજર રાખી રહ્યા છે.
– ડાંગરિયાના નરેશકુમાર બારિયા કહે છે કે લોકશાહીને મજબૂત કરવા મતદાન કરવું જરૂરી છે.
મોરવા હડફ વિધાનસભા બેઠકની પેટા ચૂંટણી માટે આજે મતદાન યોજાયું હતું. મોરવા તાલુકાના ડાંગરિયા ગામના નરેશકુમાર બારિયા સૌ પ્રથમવાર પોતાના મતાધિકારનો ઉપયોગ કર્યો હતો. તેમણે જણાવ્યું કે, લોકશાહીને મજબૂત બનાવવા માટે મતદાન કરવું જરૂરી છે. લોકશાહીના આ પર્વમાં સૌએ મતદાન કરી પોતાનો નાગરિકધર્મ અદા કરવો જોઇએ.
– ૬૦ વર્ષના દિવ્યાંગ ભારતસિંહ બારિયાના હોંસલાને સલામ…..
મોરવા હડફ વિધાનસભા બેઠકની પેટા ચૂંટણીમાં આજે થયેલા મતદાનમાં કેટલાક પ્રેરણાદાયી દ્રષ્યો જોવા મળ્યા હતા. કોઇ અશક્ત તો કોઇ વૃદ્ધ, સૌએ મતદાન કરી પોતાનો લોકશાહી પ્રત્યેનો નાગરિક ધર્મ અદા કર્યો હતો. આવો જ એક કિસ્સો ભારતસિંહ બારિયાનો પણ છે. ૬૦ વર્ષીય ભારતસિંહ બારિયા પોતે પગથી દિવ્યાંગ હોવા છતાં મતદાન કરવા માટે બૂથ સવારના પહોરમાં ટ્રાઇસીકલ લઇને પહોંચી ગયા હતા. જ્યાં તેમને પ્રાથમિક્તા આપીને અન્યો કરતા વહેલા મતદાન કરવા દેવાની વ્યવસ્થા કરી આપવામાં આવી હતી. મતદાન કર્યા બાદ તેમણે જણાવ્યું કે, મતદાન કરવું એ આપણી પવિત્ર ફરજ છે સૌએ મતદાન કરવું જોઇએ.
પંચમહાલ રાજુ સોલંકી
