નડિયાદ મહુધા રોડ પર આવેલ ભૂલી ભવાની પાટીયા નજીક ગમખ્વાર અકસ્માત સર્જાયો હતો. જેમાં નડિયાદ તરફથી બાઈક પર ત્રણ સવારીમાં આવતા યુવકોએ સ્ટેરીંગ પરનો કાબુ ગુમાવતા મહુધા તરફથી આવતી ટ્રકમાં ધડાકાભેર ટકરાતાં બે યુવકોના ઘટના સ્થળે મોત નીપજ્યા હતા. જ્યારે એક યુવક ગંભીર રીતે ઘવાતા હોસ્પિટલમાં ખસેડવામાં આવ્યો છે.
આ અંગે સ્થાનિક નાગરિકો પાસેથી મળતી વિગતો અનુસાર છીપડી કલેસરથી ત્રણ મિત્રો એક જ બાઈક પર નડિયાદ દવા લેવા સવારે નીકળ્યા હતા. ત્યાંથી તેઓ બપોરે પરત લેસર જવા નીકળ્યા હતા. તે સમયે મહુધા ભૂલી ભવાની પાટીયા નજીક બાઇકના ચાલકે સ્ટેરીંગ પરનો કાબુ ગુમાવતા મહુધા તરફથી આવતી ટ્રક સાથે ધડાકાભેર અથડાયા હતા. જોકે ટ્રક ડ્રાઈવરે બ્રેક મારી રોકવાનો પ્રયત્ન કર્યો હતો. તેમ છતાં ટ્રકની કંડક્ટર સાઈડે બાઈક ભટકાઈ હતી. અકસ્માત સર્જાતા બાઇક સવાર યુવકો રોડની બાજુના ખેતરની વાડમાં ફેંકાઇ ગયા હતા. ત્યાથી પસાર થતા વાહનચાલકોએ પોલીસને જાણ કરતા પોલીસ સહિત 108 એમ્બ્યુલન્સ ઘટના સ્થળે પહોંચી હતી. ભારે જહેમત બાદ યુવકોને રોડ પર લાવવામાં આવ્યા હતા. જેમાં બે યુવકોના ઘટના સ્થળે મોત થયા હતા અને એક યુવકને શરીરે અને માથાના ભાગે ગંભીર ઇજાઓ થતાં હોસ્પિટલમાં સારવાર અર્થે ખસેડવામાં આવ્યો હતો. મહુધા પોલીસે અકસ્માતનો ગુનો નોંધી વધુ તપાસ હાથ ધરી હતી.
નરેશ ગનવાણી : નડિયાદ
