વસ્તાન ગામના ખેડૂત પશુ પાલક અબ્દુલભાઇ આદમભાઈ રંદેરાના ઘર આંગણે બાંધેલ ચાર બકરાઓનો રાત્રી દરમિયાન દીપડાએ શિકાર કર્યો હતો. રહેણાક વિસ્તારમાં દીપડા પશુનું મારણ કરતા સ્થાનિક લોકોમાં ભય ફેલાયો છે. આ ઘટનાની જાણ સવારે વાંકલ રેન્જ વન વિભાગ કચેરીને કરવામાં આવતા વન વિભાગ દ્વારા પશુપાલકને નુકશાનીનું વળતર મળે એ માટેની જરૂરી કાર્યવાહી હાલ કરવામાં આવી છે. ત્રણ બકરા મૃત હાલતમાં સ્થળ પર મળી આવ્યા હતા જ્યારે એક બકરાને દીપડો ઉઠાવી ગયો હોવાનું ખેડૂત પશુપાલન કે જણાવ્યું છે. વસ્તાન ગામમાં અગાઉ એક મહિલા પશુપાલકની ગાયનું દીપડાએ મારણ કર્યું હતું. ત્યારબાદ અવારનવાર દીપડો શિકારની શોધમાં ગામ તરફ આવી રહ્યો હતો. દિપડા દ્વારા બીજીવાર ગામમાં પશુનું મારણ કરવામાં આવ્યું છે ત્યારે વનવિભાગ દ્વારા આવી ઘટના ન બને તે માટેની જરૂરી કાર્યવાહી કરવામાં આવે તેવી માંગણી વસ્તાન ગામના લોકો કરી રહ્યા છે.
વિનોદ મૈસુરિયા : વાંકલ
