ભરૂચ જિલ્લાના જંબુસર તાલુકાના કલક ગામે રહેતાં એક યુવક તેની પુત્રીને ગૌરીવ્રતનું ખાવું આપવા માટે બાઇક પર જઇ રહ્યાં હતાં. તે સમય દરમિયાન તેમના ગામ પાસે રોડ પરના ખાડાને કારણે તેમનું સ્ટિયરિંગ પરનો કાબુ નહીં રહેતાં બાઇક સ્લીપ થઇ ગઇ હતી.
અકસ્માાતમાં પિતાનું મોત થતાં જંબુસર પોલીસે ગુનો નોંધી આગળની કાર્યવાહી હાથ ધરી છે. જંબુસરના કલક ગામે વાળંદ ફળિયામાં રહેતાં હાર્દિક પંચાલના પિતા નવીન ધુળાભાઇ પંચાલ બાઇક લઇને જંબુસર ખાતે પરણાવેલી તેમની પુત્રી દિયાને ગૌરીવ્રતનું ખાવુ આપવા માટે નિકળ્યાં હતાં.
તેઓ ગામથી બે કિમી દુર જ ગયાં હતાં. ત્યાં રસ્તા પરના ખાડાઓને કારણે તેમનું સ્ટિયરિંગ પર કાબુ નહીં રહેતાં તેમની બાઇક સ્લીપ થઇ જતાં તેઓ જમીન પર પટકાયાં હતાં. અકસ્માતમાં તેમને ગંભીર ઇજાઓ થતાં સ્થળ પર જ તેમનું મોત નીપજ્યું હતું.
ત્યાંથી પસાર થતાં કોઇ શખ્સે તેમના ખીસ્સામાંથી મોબાઇલ કાઢી તમના પરિવારજનોને જાણ કરતાં તેઓ તુરંત સ્થળ પર દોડી આવ્યાં હતાં. મૃતકના પુત્ર હાર્દિકે જંબુસર પોલીસે ગુનો નોંધી કાર્યવાહી હાથ ધરી છે.
