ભરૂચ જિલ્લામાં દારૂ-જુગાર જેવી પ્રવૃતિઓ ઉપર લગામ લગાવવા માટે પોલીસ વિભાગ સતત સક્રિયતા દર્શાવી રહ્યું છે, જિલ્લામાં રોજ બ રોજ અલગ-અલગ સ્થળેથી હજારો અને લાખો રૂપિયાના મુદ્દામાલ સાથે દારૂ-જુગારની પ્રવૃત્તિ કરનારા ઈસમો ઝડપાઇ રહ્યા છે, તેવામાં વધુ એક આંકડાના જુગાર ઉપર પોલીસે દરોડા પાડી બે ઇસમોને જેલના સળિયા ગણતા કર્યા છે.
ભરૂચ જિલ્લાના નેત્રંગ પંથકમાં આવેલ એમ.એમ ભકતા હાઈસ્કૂલ પાસેથી મુકેશ ભાઈ છનાભાઈ વસાવા તેમજ ચિંતનભાઈ રતિલાલ વસાવા બંને રહે.નેત્રંગ નાઓને વોટ્સએપ મારફતે આંકડાનો જુગાર રમતા ઝડપી પાડી અન્ય એક ઈસમ પ્રવીણભાઈ દોશીને વોન્ટેડ જાહેર કરી બંને ઈસમો પાસેથી રોકડ રકમ સહિત મોપેડ ગાડી મળી કુલ ૪૫,૮૨૦ નો મુદ્દામાલ કબ્જે કરી કાયદેસરની કાર્યવાહી હાથધરી છે.
મહત્વની બાબત છે કે જિલ્લાના કેટલાય સ્થળે હજુ પણ વરલી મટકાના આંક ફરકના જુગારીઓ સતત સક્રિય રહ્યા છે, સોશિયલ મિડિયા થકી આ પ્રવૃતિ ખૂબ જામી હોવાની બાબત લોકોમાં ચર્ચાઈ રહી છે, તેવામાં પોલીસે પણ હવે આ પ્રવૃત્તિને ડામવા માટે સક્રિયતા બતાડી છે.
હારુન પટેલ : ભરુચ
