મધ્ય પ્રદેશ, મહારાષ્ટ્ર, ગુજરાતમાં સારા વરસાદ બાદ ડેમની જળ સપાટીમાં સતત વધારો નોંધાયો છે. ઉપરવાસમાં વરસાદી માહોલ બાદ તમામ ડેમ છલોછલ થયા છે, ત્યારે નર્મદા જિલ્લા સ્થિત આવેલ ગુજરાતની જીવાદોરી સમાન સરદાર સરોવર નર્મદા ડેમની જળ સપાટીમાં ધરખમ વધારો નોંધાયો છે, ડેમમાં સતત પાણીની આવકના પગલે ડેમની જળ સપાટી ૧૩૫ મીટરને પાર પહોંચી ચૂકી છે,જે બાદ તંત્ર દ્વારા ડેમનું રૂલ લેવલ જાળવવા માટે ડેમના તમામ દરવાજા ખોલી નર્મદા નદીમાં જળ વહેતુ કરવામાં આવ્યું છે.
મહત્વનું છે કે નર્મદા ડેમની મહત્તમ સપાટી ૧૩૮,૬૮ મીટર છે, ત્યારે ઉપરવાસમાંથી સતત ડેમમાં પાણીની આવક નોંધાઈ રહી છે જેની સામે જાવક માટે હવે તંત્ર દ્વારા ડેમના દરવાજા ખોલી નર્મદા નદીના ડાઉનસ્ટ્રીમ ભાગમાં સતત પાણી છોડવામાં આવી રહ્યું છે, સરદાર સરોવર નર્મદા ડેમ હાલ તેની મહત્તમ સપાટીથી માત્ર ૩ મીટર નીચે વહી રહ્યું છે, ડેમના દરવાજા ખોલવામાં આવતા વડોદરા, નર્મદા અને ભરૂચ જિલ્લાના નર્મદા નદીના કાંઠાના ગ્રામ્ય વિસ્તારોમાં તંત્ર દ્વારા એલર્ટ આપવામાં આવ્યું છે.
નર્મદા નદી હાલ ભરૂચના ગોલ્ડન બ્રિજ ખાતે સવારે ૧૦ કલાક સુધી ૨૦ ફૂટના લેવલ આસપાસ વહી રહી છે, ગોલ્ડન બ્રિજ ખાતે ભજનક સપાટી ૨૪ ફૂટ છે, ત્યારે હાલમાં ભયજનક સપાટીથી માત્ર ૪ ફૂટ નીચે નદી વહી રહી છે, ભરૂચ નજીક સતત નર્મદા નદીમાં વધતા જળ સ્તરના પગલે આસપાસના ઝૂંપડપટ્ટી વિસ્તારો તંત્રએ સાવચેત રહેવા માટેનું એલર્ટ આપ્યું છે, સાથે જ જરૂર પડે તો કસક સહિતની ઝૂંપડપટ્ટી વિસ્તારના લોકોને સલામત સ્થળે ખસેડવા માટેના સૂચનો પણ આપવામાં આવ્યા છે.
ડેમમાંથી સતત છોડવામાં આવતા પાણીના પગલે ભરૂચ, અંકલેશ્વર અને ઝઘડિયા આસપાસના વિસ્તારો પુરનો ખતરો ટોળાઈ રહ્યો છે. જો ગોલ્ડન બ્રિજ ખાતે જળ સપાટી ૨૪ ફૂટને વટાવી ૩૦ ફૂટ પાર પહોંચી જાય તો શહેરના નીચાણવાળા વિસ્તારોમાં પાણી પ્રવેશવાની શક્યતાઓ નકારી શકાય તેમ નથી, તેમજ આસપાસના ગ્રામ્ય વિસ્તારના ખેતરોમાં પણ પુરના પાણી પ્રવેશી શકે તેવી સ્થિતિનું સર્જન થઇ શકે તેમ છે, જોકે હાલમાં જળ સપાટીમાં સતત ઉતાર ચઢાવ જોતા પુરના સંકટના કોઈ અણસાર ન હોવાનું માનવામાં આવી રહ્યું છે.
હારુન પટેલ : ભરૂચ
મો. : 99252 22744
