ભરૂચમાં વડદલા પાસે બેકાબુ ટ્રેલરે ૨૦ થી વધુ વાહનોને કચડયા.

ભરૂચ જિલ્લાના નેશનલ હાઇવે પર વડદલાથી પાલેજ માર્ગ અકસ્માત ઝોન બનતું જઈ રહ્યું હોય તેમ લાગી રહ્યું છે, છેલ્લા કેટલાય દિવસોમાં અનેક અકસ્માતની ઘટનાઓ આ માર્ગ ઉપર બનતી દેખાઈ રહી છે જેમાં અનેક લોકોએ અત્યાર સુધી જીવ ગુમાવ્યા છે તો કેટલાય લોકો ઇજાગ્રસ્ત થઇ સારવાર લેવા મજબુર બન્યા છે, તેવામાં વધુ એક અકસ્માતની ઘટનાએ લોકોના જીવ ટાળવે ચોંટાડી દઈ ભારે નાસભાગ જેવા દ્રશ્યોનું નિર્માણ કર્યું હતું.

પ્રાપ્ત વિગતો અનુસાર ભરૂચના વડદલા નજીક એક ખાનગી શો રૂમમાં એક મહાકાય ટ્રક માટેલા સાંઢની જેમ ઘુસી આવી હતી. શો રૂમના પાર્કિંગમાં 20 થી વધુ વાહનોને નુકસાન થવા પામ્યું છે. સદર મહાકાય ટ્રકના ચાલકે સ્ટિયરિંગ પરનો કાબૂ ગુમાવતાં માટેલા સાંઢની જેમ અચાનક ટ્રક ધસી આવતા એક તબક્કે અફરાતફરીનો માહોલ સર્જાયો હતો. લોકો કઈક સમજે તે પહેલા ટ્રક શો રૂમના કંપાઉન્ડમાં ધસી આવી હતી અને લોકોના નાસભાગના દ્રશ્યો સર્જાયા હતા. સદર બનાવમાં સદનસીબે કોઈ જાનહાનિ થઈ નથી જેથી લોકોએ રાહતનો દમ લીધો હતો. ટ્રકના ડ્રાઇવરે આ ઘટના કેમ ઘટી, કઈ રીતે ઘટી તે અંગેની કોઈ સત્તાવાર માહિતી સાંપડી નથી. શો રૂમના માલિકે આ સંદર્ભે તપાસ આરંભી પોલીસ કાર્યવાહીની તજવીજ હાથધરી છે.