ભરૂચનાં પારસીવાડ વિસ્તારમાં ક્રિકેટ મેચ પર સટ્ટા બેટિંગ કરનાર એક ઇસમની પોલીસે કરી ધરપકડ.

ભરૂચ જિલ્લામાં સટ્ટા બેટિંગની ઘટનાઓ અવારનવાર સામે આવતી હોય છે તેવામાં હાલમાં ચાલતી ટી-૨૦ ક્રિકેટ મેચો ઉપર પણ સટ્ટાનો ખેલ જોવા મળી રહ્યો છે, એકના ડબલની લાલચમાં અનેક યુવાનો આ ખેલમાં બરબાદ થયા છે ત્યારે પોલીસ વિભાગ પણ હવે એકશનમાં જોવા મળી રહ્યું છે.

બનાવ અંગેની પ્રાપ્ત માહિતી અનુસાર ભરૂચ શહેરનાં બી ડિવિઝન પોલીસ મથકનાં હદ વિસ્તારમાં આવેલ પારસીવાડ ખાતે ઇંગ્લેન્ડ, ભારતની મેચ પર સટ્ટો રમાતો હોવાની બાતમીનાં આધારે પોલીસે દરોડા પાડયા હતા, જેમાં પોલીસે રવિકુમાર કેશુભાઈ ટંડેલ નામનાં એક ઇસમની ધરપકડ કરી છે.

પોલીસે ઝડપાયેલા ઈસમ પાસેથી મોબાઇલ ફોન સહિત રોકડ મળી કુલ ૧૭,૯૦૦ નો મુદ્દામાલ કબ્જે કરી તેની સામે કાયદેસરની કાર્યવાહી હાથધરી સમગ્ર મામલા અંગેની વધુ તપાસ હાથધરી છે.