ભરૂચ જિલ્લામાં ચાલુ વર્ષે આગ લાગવાની એક બાદ એક ઘટનાઓ સતત સામે આવી રહી છે, ખાસ કરી જિલ્લામાં આવેલ જીઆઈડીસી વિસ્તારો અને ગોડાઉનોમાં આગ લાગવાના બનાવોમાં વધારો સામે આવતા જોવા મળી રહ્યો છે, તેવામાં વધુ એકવાર અંકલેશ્વર વિસ્તારમાં ભંગારના ગોડાઉનમાં લાગેલ ભીષણ આગે ફાયર ફાઇટરોને દોડતા મૂકી દીધા હતા તો બીજી તરફ સ્થાનિકોના જીવ ટાળવે ચોંટી ગયા હતા.
અંકલેશ્વરમાં સ્ક્રેપ માર્કેટમાં ભીષણ આગની ઘટના સામે આવી હતી, નોબલ માર્કેટમાં સ્ક્રેપના ગોડાઉનમાં લાગેલી આગે આસપાસના ગોડાઉનોને પણ ઝપેટમાં લીધા હતા. પળભરમાં આગે વિકરાળ સ્વરૂપ ધારણ કરી લીધું હતું. ઘટનાના પગલે 2 કિમિ દૂરથી કાળાડિબાંગ ધુમાડાના ગોટેગોટા ઉડતા નજરે પડતા હતા. ફાયરબ્રિગેડને ઘટનાની જાણ કરવામાં આવતા તાત્કાલિક ફાયર ટેન્ડર ઘટનાસ્થળ તરફ રવાના કરાયા છે. સવારે 10.45 વાગ્યાના અરસામાં આ આગ વિકરાળ સ્વરૂપમાં નજરે પડતી હતી જેના ઉપર કાબુ મેળવવા લાશકરો ઝઝૂમતા નજરે પડતા હતા.
