ભરૂચ જિલ્લાના ઝઘડીયા તાલુકાના ફુલવાડી ગામે કાવેરી નદીમાંથી કોઇ અજાણ્યા ઇસમનો મૃતદેહ મળ્યો હતો. આ અંગે ઝઘડીયા પોલીસમાંથી મળતી વિગતો મુજબ ફુલવાડી ગામની કાવેરી નદીમાં કોઇ ઇસમનો મૃતદેહ જણાતા સ્થાનિક ગ્રામજનો પૈકી શૈલેષભાઇ નટવરભાઇ પટેલ રહે. ફુલવાડી તા.ઝઘડીયાનાએ ઝઘડીયા પોલીસને આ બાબતે જાણ કરી હતી. પોલીસે ઘટના સ્થળે પહોંચીને મૃતદેહનો કબજો લીધો હતો. આ ઇસમનો મૃતદેહ ડી કમ્પોઝ હાલતમાં મળ્યો હોવાથી બે ત્રણ દિવસ અગાઉ નદીમાં નહાવા જતા અથવા અન્ય કારણોસર ડુબી ગયો હોવાની શંકા જણાય છે. આશરે ૪૦ થી ૪૫ વર્ષની ઉંમરના જણાતા આ ઇસમનું મોત નદીમાં ડુબી જવાથી થયુ છેકે કોઇએ તેની હત્યા કરીને નદીમાં નાંખી દીધો હશે એ બાબતે હાલતો રહસ્ય સર્જાયેલુ જણાય છે. પોલીસ તપાસ દરમિયાન આ ઇસમના મળેલ મૃતદેહ બાબતનું રહસ્ય ખુલશે ત્યારે રહસ્યનો પર્દાફાશ થશે એમ હાલતો દેખાઇ રહ્યુ છે. ઝઘડીયા પોલીસે આ બાબતે નોંધ લઇને આગળની કાર્યવાહી હાથ ધરી હતી.
ગુલામહુશેન ખત્રી રાજપારડી જિ.ભરૂચ
