નર્મદામા હાલ ભારે વરસાદ પડી રહ્યો હોઈ નદીઓમાં પાણીની આવક સતત વધી રહી છે ત્યારે ડેડીયાપાડા તાલુકાના કૂકરી પાદરથી આગળ આવેલ દેવ નદીના ઊંડા પાણીમાં એક અજાણ્યા યુવાનનું ડૂબી જવાથી કરુણ મોત નીપજ્યું છે. આ અંગે ડેડીયાપાડા પોલીસે અકસ્માત મોતનો ગુનો નોંધી કાયદેસરની કાર્યવાહી હાથ ધરી છે.
બનાવની વિગત અનુસાર પાંચેક દિવસ પહેલા કોઈ પણ કૂકરી પાદરથી આગળ આવેલ દેવ નદીના નાળા(પુલ)થી આશરે ૧૦૦ મીટર દૂર કિનારાથી ૨૦ ફૂટ ઉપર નદીના પાણીમાં અજાણ્યો યુવાન ડૂબી ગયાની ખબર લીમજીભાઇ ખોમાભાઇ વસાવા(ઉ.વ.૪૬ રહે.ડુમખલ નિશાળ ફળિયું તા.ડેડીયાપાડા) એ આપી હતી. જેમાં મરનાર કોઈ અજાણ્યો પુરૂષ ઈસમ ઉ.વ.આશરે ૩૦થી ૩૫ વર્ષ જેના નામ સરનામું જણાઈ આવેલ નથી. તે ડૂબી ગયેલ જેને શરીરે લાંબી બાયનો કાળા તથા વાદળી કલરનો શર્ટ પહેરેલ છે તથા કમરે કાળા કલરનો મેલા જેવો હાફ ચડ્ડો પહેરેલ છે જે દેવ નદીના પાણીમાં પડી ડૂબી જવાથી તેનું મોત નીપજતા પોલીસે અકસ્માત મોત ગુનાની ફરિયાદ નોંધી કાયદેસરની કાર્યવાહી હાથ ધરી છે.
જ્યોતિ જગતાપ, રાજપીપલા
