ભરૂચ જિલ્લાના ઝઘડીયા તાલુકાના ઉમલ્લા દુ.વાઘપુરા ગામે એક મકાનના આંગણામાં પાર્ક કરીને મુકેલ મોટરસાયકલ રાત્રી દરમિયાન ચોરાવા પામી હતી.
આ અંગે ઉમલ્લા પોલિસમાંથી પ્રાપ્ત વિગતો મુજબ ઉમલ્લા દુ.વાઘપુરા ગામે મેડિકલ સ્ટોર ચલાવતા મિતેષભાઇ કનૈયાલાલ અગ્રવાલે તેમની હિરો કંપનીની મોટરસાયકલ ગત તા.૧૭ મીના રોજ સાંજના સાતેક વાગ્યે ઘરના આંગણામાં પાર્ક કરીને મુકી હતી. ત્યારબાદ ઘરના બધા સભ્યો રાતના દસેક વાગ્યાના સમયે સુઇ ગયા હતા. સુતા પહેલા આંગણામાં જોતા મોટરસાયકલ પાર્ક કરેલ જગ્યાએ હતી. સવારના છ વાગ્યે મિતેષભાઇ જાગીને બહાર આવ્યા તો ઘરના આંગણામાં પાર્ક કરીને મુકેલ મોટરસાયકલ તેની જગ્યાએ હતી નહિ. બાદમાં આજુબાજુ બધી જગ્યાએ મોટરસાયકલ શોધવા છતા મળેલ નહિ, તેથી મોટરસાયકલ રાત્રી દરમિયાન ચોરાઇ ગઇ હોવાની ખાતરી થવા પામી હતી. આ અંગે મિતેષભાઇ કનૈયાલાલ અગ્રવાલ રહે.ઉમલ્લા દુ.વાઘપુરા તા.ઝઘડીયાનાએ ઉમલ્લા પોલીસમાં મોટરસાયકલ ચોરી બાબતે ફરિયાદ લખાવતા પોલીસે ગુનો નોંધી તપાસ હાથ ધરી હતી.
ગુલામહુશેન ખત્રી રાજપારડી જિ.ભરૂચ
