ભરૂચ જિલ્લાના ઝઘડીયા નજીક આવેલ બોરોસિલ નામની કંપનીમાં ઝાડેશ્વરના કુશ નિલેશભાઇ પટેલ ટ્રાન્સપોર્ટર તરીકે કામ કરે છે. બે દિવસ પહેલા ઝઘડીયા તાલુકાના ખરચી ખાતે રહેતા બિપીનભાઇ હરિભાઇ વસાવાએ કુશ પટેલ પાસે કામની માંગણી કરી હતી. આ બાબતે કુશ નિલેશભાઇ પટેલે બિપીન હરિભાઈ વસાવા અને સુખદેવ ઉર્ફે બોડો બન્ને રહે.ખર્ચી ભિલવાડા તા.ઝઘડીયા વિરુધ્ધ તેમની ગાડીઓ અટકાવીને ગાળો દઇને ટાંટીયા ભાંગી નાંખવાની ધમકી આપ્યાની ફરિયાદ ઝઘડીયા પોલીસમાં લખાવી હતી. દરમિયાન ગતરોજ બિપીનભાઇ હરિભાઈ વસાવા રહે.ખર્ચી ભિલવાડા નાએ નિલેશભાઇ મગનભાઈ પટેલ અને કુશ નિલેશભાઇ પટેલ બન્ને રહે.ઝાડેશ્વર ભરૂચ વિરુધ્ધ જાતિવિષયક અપમાન કરીને માર માર્યો હોવા ઉપરાંત સોનાની ચેન લુંટી લેવા બાબતની ફરિયાદ ઝઘડીયા પોલીસમાં લખાવી હતી.
ફરિયાદમાં જણાવાયા મુજબ આ કામના આરોપીઓ પાસે હાઇવા ગાડીઓ હોઇ તેઓ બોરોસિલ કંપનીમાં ટ્રાન્સપોર્ટર તરીકે કામ કરેછે. ફરિયાદી બિપીનભાઇ વસાવાએ તેમની પાસેથી કામ માંગતા આરોપીઓએ ફરિયાદીને જાતિવિષયક અપમાનજનક શબ્દો કહીને ગાળો બોલીને માર માર્યો હતો, તેમજ જાનથી મારી નાંખવાની ધમકી આપીને ફરિયાદીએ પહેરેલ રૂ.૮૦૦૦૦ ની કિંમતની સોનાની ચેન લુંટી લીધી હતી. ઝઘડીયા પોલીસે આ અંગે ગુનો નોંધી તપાસ હાથ ધરી હતી.
ગુલામહુશેન ખત્રી રાજપારડી જિ.ભરૂચ
