ભરૂચ જિલ્લાના ઝઘડીયા તાલુકાના રાજપારડી નજીક નેત્રંગ રોડ પર એક અજાણ્યા હાઇવા ટ્રકના ચાલકે એક મોટરસાયકલને અડફેટમાં લેતા મોટરસાયકલ ચાલકનું કરુણ મોત નીપજ્યુ હતુ, જ્યારે મોટરસાયકલ પાછળ બેઠેલ અન્ય એક ઇસમ ગંભીર રીતે ઇજાગ્રસ્ત થયો હતો. આ અંગે રાજપારડી પોલીસમાંથી પ્રાપ્ત વિગતો મુજબ રાજપારડી નજીક નેત્રંગ રોડ પર આવેલ એક ક્વોરીમાં ઓપરેટર તરીકે નોકરી કરતો ધોલી ગામનો રાકેશભાઇ વલુસીંગભાઇ વસાવા નામનો યુવાન ગઇકાલ તા.૧૫ મીના રોજ સાંજના સાત વાગ્યે ક્વોરી પરથી છુટીને ઘરે જતો હતો. ત્યારે થોડે દુર રઝલવાડા ગામનો અદલભાઇ અભલાભાઇ વસાવા નામનો ઇસમ મોટરસાયકલ લઇને જતો હોઇ, રાકેશ મોટરસાયકલ પર પાછળ બેઠો હતો. તેઓ રઝલવાડા ગામ તરફ જઇ રહ્યા હતા ત્યારે સામેથી આવી રહેલ એક હાઇવા ટ્રકના ચાલકે મોટરસાયકલને અડફેટમાં લઇ અકસ્માત સર્જ્યો હતો. અકસ્માત સર્જીને હાઇવા ચાલક ફરાર થઇ ગયો હતો. આ અકસ્માતમાં બાઇક ચાલક અદલભાઇ અભલાભાઇ વસાવા ગંભીર રીતે ઇજાગ્રસ્ત થતા તેમનું મોત નીપજ્યુ હતુ. જ્યારે ઇજાગ્રસ્ત થયેલ રાકેશને અવિધા સરકારી દવાખાને પ્રાથમિક સારવાર અપાયા બાદ વધુ સારવાર માટે ભરુચ લઇ જવાયો હતો. ફરિયાદી રાકેશ વલુસીંગભાઇ વસાવા, રહે.ગામ ધોલી, તા.ઝઘડીયા, જિ.ભરૂચની ફરિયાદ મુજબ રાજપારડી પોલીસે અકસ્માત સર્જી નાસી ગયેલ હાઇવા ટ્રકના ચાલક વિરુધ્ધ ગુનો નોંધી તપાસ હાથ ધરી હતી.
ગુલામહુશેન ખત્રી રાજપારડી જિ.ભરૂચ
