પંચમહાલ જિલ્લાનાં શહેરા તાલુકાનાં સદનપુર ગામે આવેલા એક ખેતરનાં કૂવામાં બે નીલગાયો પડી જતા વનવિભાગ અને ગ્રામજનો દ્વારા રેસ્ક્યુ ઓપરેશન હાથ ધરવામાં આવ્યુ હતું.
મળતી માહિતી અનુસાર શહેરા તાલુકાના સદનપુર ગામના એક ખેતરમાં કૂવો આવેલો છે. સ્થાનિકોને બે નીલગાય પડેલી જોવા મળી હતી. પોતાનો જીવ બચાવવા આમતેમ કૂવામાં ફરતી હતી. સ્થાનિકો દ્વારા તાત્કાલિક શહેરા વનવિભાગને જાણ કરવામા આવી હતી. વનવિભાગનાં કર્મીઓ અને સ્થાનિક લોકો દ્વારા કૂવામા પડેલી નીલગાયોને બચાવાનું રેસ્ક્યુ ઓપરેશન હાથ ધરવામાં આવ્યુ હતું. કુવામાં પાણી ભરેલુ હોવાથી નીલગાયોને બહાર કાઢવાનુ કામ સહેલુ ન હતું. વનવિભાગને ભારે જહેમત કરવી પડી હતી. દોરડા અને જાળીની મદદથી તેને બહાર કાઢવાની કામગીરી શરૂ કરવામાં આવી હતી. નીલગાયને બચાવાનું ઓપરેશન કલાકો સુધી ચાલ્યું હતું. આખરે મહેનતનાં અંતે બંને નીલગાયોને પાણીથી ભરેલા કૂવામાંથી બહાર લાવવામાં વનકર્મીઓ અને ગ્રામજનોને સફળતા મળી હતી. નીલગાયો બહાર નીકળતા નજીકનાં સદનપૂરનાં જંગલમા જતી રહી હતી. આમ ગ્રામજનો અને વનવિભાગની મહેનતને કારણે કુવામા પડેલી નીલગાયોનો જીવ બચ્યો હતો.
પંચમહાલ, રાજુ સોલંકી
