ભરૂચ જિલ્લાના ઝઘડીયા તાલુકાના નર્મદા કાંઠે આવેલ રૂંઢ ગામની યુવતીની નર્મદામાં તણાતી લાશ મળી આવતા ચકચાર મચી જવા પામી છે.રાજપારડી પોલીસમાંથી મળતી વિગતો મુજબ રૂંઢ ગામના ભરતભાઇ ચંદુભાઇ મકવાણાની ૨૨ વર્ષીય કિંજલબેન નામની દિકરી તા.૧૦ મીના રોજ રાત્રીના અઢી વાગ્યાના અરસામાં ઘરમાં નહિ જણાતા કિંજલ ની માતાએ તેના પતિને જગાડીને આ બાબતની જાણ કરતા કિંજલની શોધખોળ કરવામાં આવી હતી.વધુમાં જાણવા મળ્યા પ્રમાણે કિંજલને ગામના જ એક ભૌમિકકુમાર ધોબી નામના યુવક સાથે પ્રેમ સંબંધ હતો તેથી યુવતીના માતા પિતાએ ભૌમિકના ઘેર જઇને તપાસ કરતા તે પણ ઘેર મળી આવેલ નહિ.દરમિયાન તા.૧૧ મીના રોજ ૩ વાગ્યે ખબર મળી હતી કે કિંજલની નદીમાં તરતી લાશ દેખાઇ છે.બાદમાં કિંજલના મૃતદેહને અવિધા દવાખાને પી.એમ.માટે લઇ જવાયો હતો.મૃતક ના પિતા એ રાજપારડી પોલીસને આ બાબતે જાણ કરી હતી.
ગુલામહુશેન ખત્રી રાજપારડી
