ભરૂચ નેશનલ હાઇવે પરથી પસાર થઇ રહેલાં અેક ટવેરા કારના ચાલકને કારમાં વાપીથી મુસાફર તરીકે બેસેલાં ત્રણ યુવાનોઅે માર મારી રોકડા રૂપિયા 25 હજાર તેમજ કારની લૂંટ ચલાવી ફરાર થઇ ગયાં હતાં. બનાવ સંદર્ભે ભરૂચ સી ડિવિઝન પોલીસે ગુનો નોંધી અાગળની કાર્યવાહી હાથ ધરી છે.
પોલીસ સુત્રોમાંથી મળતી માહિતી અનુસાર, યુપીના બદાયુ ખાતે રહેતો ઉસ્માન ગફુર ગાજી તેના માલિકની ટવેરા કાર લઇને બદાયુથી મેન્થોલ કેમિકલના ડબ્બા ભરીને અંક્લેશ્વર, પાનોલી જીઅાઇડીસી તેમજ દમણ ખાતે અલગ અલગ સ્થળે ડિલીવરી અાપવા માટે રવાના થયો હતો. સામાનની ડિલીવરી કર્યાં બાદ તે દમણથી બદાયુ પરત જવા માટે નિકળતાં રસ્તામાં વાપી પાસે તેને ત્રણ યુવાનો મળ્યાં હતાં. જેઅોઅે તેમને વડોદરા જવાનું જણાવતાં તેમને મુસાફર તરીકે તેણે કારમાં બેસાડ્યાં હતાં. દરમિયાન ભરૂચમાં નર્મદાબ્રીજ પસાર કર્યાં બાદ બે બ્રીજ પુરા કરી અાગળ જતાં ત્રણેય શખ્સોઅે તેેન કાર ઉભી રાખવા જણાવ્યું હતું.
તેણે કાર રોકતાં ત્રણેયે તેના પર હૂમલો કરી તેને માર મારી તેની પાસેના રોકડા રૂપિયા 25 હજાર તેમજ કારની લૂંટ ચલાવી ત્યાંથી નાસી છુટ્યાં હતાં. બનાવ સંદર્ભે તેણે ભરૂચ સી ડિવિઝન પોલીસ સ્ટેશને ફરિયાદ નોંધાવતાં પોલીસે ગુનો નોંધી અાગળની કાર્યવાહી હાથ ધરી છે.સૌજન્ય
