નાંદોદના બીતાડામાં તાલિબાની કૃત્ય:પ્રેમલગ્ન મુદ્દે યુવતીના પિતાએ યુવકની માતાને ખૂંટે બાંધી માર માર્યો.

(વિશાલ મિસ્ત્રી રાજપીપળા)

નર્મદા જિલ્લાના નાંદોદ તાલુકાના બીતાડા ગામે પ્રેમલગ્ન મુદ્દે યુવતીના પિતાએ યુવકની માતાને અને પિતાને ઢોર માર મારી યુવકની માતાને ખુંટે બાંધી દીધી હોવાનો તાલિબાની કિસ્સો પ્રકાશમાં આવ્યો છે.જોકે આ ઘટનાની જાણ ગામનાજ એક વ્યક્તિએ 181 મહિલાઅભયમ હેલ્પલાઈનને કરી હતી.ત્યારે 181 મહિલા અભયમની ટિમ પોલીસ ટિમ સાથે ત્યાં પહોંચી ગઈ હતી અને એ મહિલાને ખુંટેથી છોડાવી રાજપીપળા પોલીસ મથક પર લાવી હતી.જોકે માતા-પિતાએ પુત્રએ કરેલા પ્રેમલગ્નની સજા ભોગવવાનો વારો આવ્યો હતો.

મળતી માહિતી મુજબ નાંદોદના બીતાડા ગામના એક યુગલે આજથી 8 મહિના અગાઉ ભરૂચના ઝઘડિયાની કોર્ટમાં લગ્ન કરી પોતાની ઝીંદગી જીવી રહ્યા હતા.દરમિયાન યુવતીના પિતા મોહન વસાવાએ યુવકના પરિવારજનો પાસેથી દાવા પેટે અમુક ચોક્કસ રકમની માંગણી કરી.જે માંગણી યુવકના પિતાએ પુરી ના કરતા યુવતીના પિતાએ 15મી ફેબ્રુઆરીએ સવારે 8 કલાકે યુવકની માતા બચી વસાવા અને પિતા ભરત વસાવાને ઢોર માર માર્યો.જેથી ગભરાયેલ યુવકના પિતા ત્યાંથી ભાગી ગયા પરંતુ યુવકની માતાને ગામમાં જ એક ખુટા સાથે બાંધી દીધી.તો આ દ્રશ્ય ગામના જ એક વ્યક્તિથી ના જોવાતા એણે 181 મહિલા અભયમ હેલ્પલાઈનને ફોન દ્વારા જાણ કરી.તો તુરંત 181ની ટિમ પોલિસ બંદોબસ્ત સાથે બીતાડા ગામે પહોંચી ગઈ.અને યુવકના પિતાને કાયદાકીય સમજાવટ આપી પીડિત મહિલાને છોડાવી રાજપીપળા પોલીસ મથકે લવાઈ હતી.આમ 181 અભયમ મહિલા હેલ્પલાઈને પીડિત મહિલાને વેવાઈના ચુંગલમાંથી છોડાવી હતી.

આ મામલે નર્મદા જિલ્લા 181 અભયમ મહિલા હેલ્પલાઈનના કાઉન્સિલર જ્યોતિ વાઘમારેએ જણાવ્યું હતું કે અમને આ ઘટનાની જાણ બીતાળા ગામના જ એક વ્યક્તિએ ફોન દ્વારા કરી હતી.અમે તુરંત ત્યાં પહોચી પ્રથમ તો મહિલાને છોડાવવાનો પ્રયત્ન કર્યો પણ યુવકનો પિતા એક નો બે ન થયો.મહિલાને સવારે 8 વાગ્યાથી બપોરે અમે બપોરે 1 વાગે પહોંચ્યો ત્યાં સુધી ખુંટે ઢોરની જેમ બાંધી રાખી હતી.બાદ કાયદાકીય સમજાવટ આપી ત્યારે મહિલાને છોડવામાં આવી હતી.સ્થળ પર આ કેસનું સમાધાન ન થયું હોવાથી આ કેસ રાજપીપળા પોલીસને હેન્ડઓવર કર્યો હતો.

આ મામલે નર્મદા ડીએસપી મહેન્દ્ર બગડીયાએ જણાવ્યું હતું કે બીતાળા ગામે બનેલી ઘટના પાછળ ઓછું શિક્ષણ જવાબદાર છે.રાજપીપળા પોલીસ દ્વારા આ મામલે મહિલાની ફરિયાદ લેવાની તજવીજ હાથ ધરાઇ હતી.પરંતુ સમાજના પંચોની દરમિયાનગિરીને લીધે અમુક દંડની રકમ ભરપાઈ કરવાની શરતે બન્ને પક્ષે સમાધાન થયું છે.181  અભયમ મહિલા હેલ્પલાઈનને લીધે બીતાળા ગામે મોટી ઘટના બનતી અટકી છે.

ગુજરાત રાજ્ય મહિલા સુરક્ષા સમિતિના સભ્ય ભારતીબેન તડવીએ જણાવ્યું હતું કે અભયમ મહિલા હેલ્પલાઈનની કામગીરી બિરદાવવા લાયક છે.આવા કિસ્સામાં જવાબદારો સામે પગલાં લેવાવા જ જોઈએ.આ મામલે ગુજરાત સરકાર અને મહિલા આયોગને જાણ કરી યોગ્ય પગલાં ભરવાની માંગ કરાશે.