ગુજરાતના નર્મદા જિલ્લામાં શુક્રવારે બપોરે કોમી તણાવ સર્જાયો હતો. સેલંબા વિસ્તારમાં બજરંગ દળની શૌર્ય યાત્રા પર થયેલા હુમલા બાદ ભારે હિંસા થઈ હતી, જેમાં પાંચ લોકો ઘાયલ થયા હતા. પથ્થરમારો બાદ આગચંપી પણ થઈ હતી. પોલીસે ટીયરગેસના સેલ છોડીને સ્થિતિ કાબુમાં લીધી હતી. આ વિસ્તારમાં મોટી સંખ્યામાં પોલીસ ફોર્સ તૈનાત કરવામાં આવી છે. હાલ સ્થિતિ નિયંત્રણમાં છે.
મુસ્લિમ કોલોનીમાંથી પથ્થરમારો
મીડિયા અહેવાલ અનુસાર, આજે સવારે ગણેશ વિસર્જન બાદ સેલંબામાં બજરંગદળ દ્વારા જાગરણ શૌર્ય યાત્રા કાઢવામાં આવી હતી. દરમિયાન જ્યારે યાત્રા મુસ્લિમ વિસ્તારમાંથી પસાર થઈ ત્યારે કેટલાક બદમાશોએ યાત્રા પર પથ્થરમારો કર્યો હતો. યાત્રા દરમિયાન થોડી સંખ્યામાં પોલીસકર્મીઓ હાજર હતા, જેઓ ભીડને કાબૂમાં કરી શક્યા ન હતા. આ પછી, પોલીસ દળ ઘટનાસ્થળે પહોંચી અને બદમાશોને કાબૂમાં લીધા.
દુકાનો અને મકાનોને પણ નુકસાન
પથ્થરમારામાં કેટલાક લોકો ઘાયલ થયા છે, જેમને ખાનગી હોસ્પિટલમાં દાખલ કરવામાં આવ્યા છે. પથ્થરમારો બાદ બે દુકાનોને પણ આગ ચાંપવામાં આવી હતી. પથ્થરમારાના કારણે લગભગ એક ડઝન ઘરોને પણ નુકસાન થયું હતું. રસ્તાઓ પર પાર્ક કરાયેલા ડઝનબંધ વાહનોમાં પણ તોડફોડ કરવામાં આવી હતી. તણાવને જોતા નર્મદા જિલ્લાના ડેપ્યુટી એસપી, એલસીબી અને એસઓજીની પોલીસ ટીમો પણ સેલંબામાં તૈનાત કરવામાં આવી છે. આ કેસમાં લગભગ 10 લોકોની અટકાયત કરવામાં આવી છે. સીસીટીવી ફૂટેજની મદદથી અન્ય બદમાશોની શોધખોળ ચાલુ છે. આ વિસ્તારમાં પોલીસની ફ્લેગ માર્ચ પણ ચાલી રહી છે.
વડોદરામાં ગણેશ વિસર્જન દરમિયાન પથ્થરમારો
ગુરુવારે વડોદરા જિલ્લાના સાવલી તાલુકાના મંજુસર ગામમાં પણ પથ્થરમારાની આવી જ ઘટના બની હતી. ગણેશ વિસર્જન દરમિયાન નીકળેલા સરઘસ પર વિધર્મી સમુદાયના કેટલાક લોકોએ પથ્થરમારો કર્યા બાદ અહીં સ્થિતિ વણસી ગઈ હતી. જોકે, પોલીસે તરત જ પરિસ્થિતિને કાબૂમાં લીધી હતી. આ કેસમાં પોલીસે 10થી વધુ બદમાશોની અટકાયત કરી છે. પોલીસ ફોર્સ પણ અહીં તૈનાત છે.
