ભરૂચ જીલ્લો અવારનવાર હવાલા કાંડના રેકેટથી ગુંજી ઉઠતો હોય છે, જિલ્લામાં ગેરકાયદેસર રીતે લવાતા લાખો રૂપિયા હવાલા મારફતે પહોંચતા હોય છે, તેવામાં ભરૂચ શહેરમાં ફરી એકવાર હવાલા કાંડ ઝડપાયો છે, જેમાં લાખોની રોકડ સાથે એક ઈસમની સ્પેશિયલ ઓપરેશન ગ્રુપ દ્વારા ધરપકડ કરવામાં આવતા ભારે ખળભળાટ મચ્યો છે.
ભરૂચ સ્પેશિયલ ઓપરેશન ગ્રુપના કર્મીઓને મળેલ બાતમીના આધારે ભરૂચના પાંચબત્તી સર્કલ વિસ્તારમાં વોચ ગોઠવી હતી, દરમ્યાન સર્કલ પાસેથી પસાર થતી રીક્ષા નંબર GJ 16 AT 6015 ને રોકી તેમા હાજર ઈસમ રફીક અલ્લી ઇબ્રાહીમ કોઢીયા રહે. ટંકારીયા નાઓની પાસેથી 19 લાખ ઉપરાંતની રકમ મળી આવી હતી, જે બાબતે પોલીસે પૂછપરછ કરતા કોઈ સંતોષ કારક જવાબ ઈસમ દ્વારા આપવામાં આવ્યો ન હતો.
જે બાદ સ્પેશિયલ ઓપરેશન ગ્રુપ દ્વારા લાખોની ગેરકાયદેસર રકમ સાથે ઈસમની ધરપકડ કરી આ રૂપિયા ક્યાંથી લીધા અને ક્યાં આપવાના હતા તેમજ આ અગાઉ પણ હવાલા કાંડ કર્યું છે કે કેમ તે તમામ દિશાઓમાં તપાસના ધમધમાટ શરૂ કર્યા છે.
