ભરૂચ જિલ્લાના પોલીસ વડા તરીકેનો હવાલો ડો.લીના પાટીલે સંભાળ્યા બાદથી બે નંબરી તત્વો સામે લાલઆંખ કરી હોય તેમ સતત બુટલેગરો અને જુગારીઓ સહિતની ગુનાખોરીને અંજામ આપતા તત્વો સામે પોલીસે સપાટો બોલાવ્યો છે, જેમાં ભરૂચ શહેરમાં બિન્દાસ અંદાજમાં નશાનો વેપલો કરતા તત્વો પણ હવે પોલીસની પકડમાં આવી રહ્યા છે.
ભરૂચના સ્ટેશન રોડ પર રોટરી કલબની પાછળના ભાગે આવેલ મારવાડી ટેકરા વિસ્તારમાં ચાલતા નશાના વેપલા ઉપર શહેર એ ડિવિઝન પોલીસે દરોડા પાડી ભારતીય બનાવટના વિદેશી દારૂ સહિત બિયરનો જથ્થો સહિત એક ગાડીને ઝડપી પાડી કુલ ૬,૨૨,૧૦૦ નો મુદ્દામાલ કબ્જે કર્યો હતો.
પોલીસના દરોડામાં મારવાડી ટેકરા વિસ્તારમાં શરાબનો વેપલો કરતો એવો કુખ્યાત બુટલેગર હનીફ ઉર્ફે અનું ઇમરાન શાહ દીવાન તેમજ મુનાફ અબ્દુલ રહેમાન સૈયદ નામના ઇસમોની પોલીસે ધરપકડ કરી બંને સામે ગુનો દાખલ કરી કાયદેસરની કાર્યવાહી હાથ ધરતા નશાનો વેપલો કરતા બુટલેગરોમાં ફફડાટનો માહોલ છવાયો હતો.
હારુન પટેલ : ભરુચ
