ભરૂચ જિલ્લાના અંકલેશ્વર નેશનલ હાઇવે ૪૮ ને અડીને આવેલા ભંગાર અને પ્લાસ્ટિકના ગોડાઉનો અવારનવાર આગ લાગવાની ઘટનાઓના કારણે ચર્ચામાં આવતા હોય છે, ત્યારે વધુ એક ઘટના આજે સવારે બનતા એક સમયે લોકોમાં ભારે નાસભાગ મચી હતી.
અંકલેશ્વરના નોબલ માર્કેટ ખાતે આજે સવારના સમયે એક પ્લાસ્ટિકના ગોડાઉનમાં અચાનક આગ ભભૂકી ઉઠી હતી, જોત જોતામાં આગે વિકરાળ સ્વરૂપ ધારણ કરતા ઉપસ્થિત લોકોમાં ભારે નાસભાગ મચી હતી અને ગોડાઉનમાં રહેલા મહત્વના માલસામાનને સ્થળ પરથી હટાવવાની કવાયત હાથ ધરાઈ હતી, આગના ધુમાડા દુરદુર સુધી જોવા મળતા લોકોમાં પણ એક તબક્કે ગભરાટનો માહોલ છવાયો હતો, જોકે સમગ્ર ઘટના અંગેની જાણ અંકલેશ્વર DPMC ના ફાયર વિભાગને કરવામાં આવતા બે થી વધુ લાયબંબાઓએ સ્થળ પર દોડી જઈ આગ પર પાણીનો મારો ચલાવી તેને કાબુમાં લીધી હતી.
મહત્વની બાબત છે કે અંકલેશ્વર હાઇવેને અડીને આવેલા અનેક એવા ગોડાઉનો છે જેમાં અવારનવાર આગ લાગવાની ઘટનાઓ સામે આવતી હોય છે ત્યારે આ ઘટનાઓને લઇ તંત્રએ પણ ચોક્કસ દિશાઓમાં તપાસ કરવાની જરુર જણાય છે કારણ કે થોડા દિવસો અગાઉ પણ રેલવે ટ્રેક પાસેના એક ગોડાઉનમાં ભીષણ આગ લાગતા એક સમયે ટ્રેન વ્યવહાર ઉપર પણ તેની સીધી અસર જોવા મળી હતી ત્યારે વધુ એક આગની ઘટના સામે આવ્યા બાદ મામલે ચોક્કસ દિશામાં તપાસ થાય તેમ જાગૃત નાગરિકોમાં ચર્ચાઇ રહ્યું છે.
હારુન પટેલ
