વડોદરા જિલ્લાના કરજણ તાલુકાના નારેશ્વર પાલેજ માર્ગ ઉપર આવેલ માલોદ ગામના વળાંક પાસે બે દિવસ પહેલા એક ડમ્પરની અડફેટે માછી પરિવારના એક માસુમ બાળક સહિત પતિ પત્નીનું ઘટના સ્થળે કમકમાટીભર્યું મોત નીપજ્યું હતું જે બાબતે કરજણ પોલીસ સ્ટેશને ગુનો નોંધાયો હતો.
સદર ગોજારી ઘટનાને પગલે સમગ્ર પંથકમાં ઘેરા શોકની લાગણી વ્યાપી હતી. જેને લઈને રેત માફિયાઓ અને રોડ ઉપર આડેધડ, બેફામ દોડતાં ઓવરલોડિંગ રેતીની ટ્રકો, હાઈવા સામે લોકોમાં ઉગ્ર આક્રોશ ઉભો થયો હતો અને અકસ્માત કરનાર અજાણ્યા ડમ્પર ચાલકની વહેલી તકે ધરપકડ માટેની ઉગ્ર માંગ ઉઠવા પામી હતી. જેના ઘેરા પ્રત્યાઘાતો પડતાં ભરૂચના સાંસદ, રાજકીય નેતાઓ, સરકારી અધિકારીઓ સહિત પોલીસ કાફલો ઘટના સ્થળે દોડી આવ્યો હતો. જે બાબતે કરજણ પોલીસ ઇન્સ્પેકટર એમ.એ.પટેલના નેતૃત્વ હેઠળ અલગ – અલગ ટીમ બાનાવી બનાવવાળી જગ્યાએથી નારેશ્વરથી કરજણ તરફ તથા પાલેજ તરફથી નારેશ્વર તરફ જતા રોડની આજુબાજુમાં આવેલ સી.સી.ટી.વી ફુટેજ તેમજ સ્થાનીક માણસોની પુછપરછ કરતા એક પીળા કલરનું ડંપર આ બનેલ ગંભીર અકસ્માતમાં એક્સીડન્ટ કરી ભાગી ગયેલ હોવાનું બહાર આવ્યું હતું. જે હકિકત આધારે સી.સી.ટી.વી ફુટેજ ચેક કરતાં ડમ્પર બનાવવાળી જગ્યાએથી નારેશ્વર થઇ કુરાલી તરફ ગયેલ હોવાનું જણાતા કુરાલી ચોકડીના સી.સી.ટી.વી ફુટેજ ચેક કર્યા હતાં. જેમાં પીળા કલરનું ડંપર .નં. GJ – 17 – UU – 0538 અશોક લેલન કંપનીનું મળી આવેલ હતું. તપાસ કરતા ડંપર ચાલક જયંતીભાઇ મંગળભાઇ પરમાર રહે.રામપુરા ગામ તા.ગલતેશ્વર જી.ખેડા નો હોવાનું જણાતા એની અટકાયત કરી કાયદેસરની કાર્યવાહી હાથ ધરાઈ છે.
યાકુબ પટેલ, કરજણ
